အာဏာသိမ်းစစ်တပ်၏ တိုင်းပြည်ဘဏ္ဍာငွေကို ဖြုန်းတီးခဲ့မှုများ

အာဏာသိမ်းစစ်တပ်သည် နှစ်စဉ်နှစ်တိုင်း နိုင်ငံ၏ဘဏ္ဍာငွေများကို ဝန်ကြီးဌာနအားလုံးထက် များစွာရယူသုံးစွဲ နေခြင်းကို မြန်မာနိုင်ငံပြည်သူလူထုမှ ပိုမိုသိရှိနားလည်နိုင်စေရန် ၂၀၁၉-၂၀၂၀ ဘဏ္ဍာနှစ်၊ ၂၀၂၀-၂၀၂၁ဘဏ္ဍာနှစ်နှင့် ၂၀၂၁-၂၀၂၂ ၆လစာ (၃) နှစ်ကို အနီးစပ်ဆုံး နှိုင်းယှဉ်ပြီး တွေ့ရှိချက်များကို တင်ပြထားခြင်းဖြစ်ပါသည်။အရှေ့တောင်အာရှနိုင်ငံများဖြစ်သော စင်္ကာပူနိုင်ငံသည် ၂၀၁၉ – ၂၀၂၀ ခုနှစ်တွင် အစိုးရအသုံးစရိတ်၏ ၂၀.၁ ရာခိုင်နှုန်းရှိခဲ့ပြီး ထိုင်းနိုင်ငံနှင့် ဖိလစ်ပိုင်နိုင်ငံတို့သည် ၆.၂ရာခိုင်နှုန်းနှင့် ၄.၂ ရာခိုင်နှုန်း အသီးသီးရှိခဲ့ကြသည်။ ၂၀၂၀-၂၀၂၁ တွင် စင်္ကာပူနိုင်ငံသည် အစိုးရအသုံးစရိတ်၏ ၁၁.၃ ရာခိုင်နှုန်း၊ ထိုင်းနိုင်ငံနှင့် ဖိလစ်ပိုင်နိုင်ငံတို့သည် ၅.၅ ရာခိုင်နှုန်း နှင့် ၄ ရာခိုင်နှုန်း အသီးသီးရှိခဲ့ကြပါသည်။ ဖွံ့ဖြိုးပြီးနိုင်ငံများတွင် အစိုးရ၏အသုံးစရိတ်မှ စစ်တပ်အသုံးစရိတ်ရာခိုင်နှုန်း သည် မြန်မာနိုင်ငံ အစိုးရအသုံးစရိတ်မှ အာဏာသိမ်းစစ်တပ်အသုံးစရိတ်ရာခိုင်နှုန်းထက် များစွာလျှော့နည်းနေသည်ကို မြင်တွေ့နေရပါသည်။ ၂၀၁၉-၂၀၂၀ ဘဏ္ဍာနှစ်တွင် အာဏာသိမ်းစစ်တပ်လက်အောက်ရှိ ကာကွယ်ရေးဝန်ကြီးဌာန၊ ပြည်ထဲရေး ဝန်ကြီးဌာနနှင့် နယ်စပ်ရေးရာဝန်ကြီးဌာနတို့သည် နိုင်ငံတော်ဘဏ္ဍာငွေ၏စုစုပေါင်း ၂၄ ရာခိုင်နှုန်းကို ရယူသုံးစွဲ နေခဲ့သည်။

ထိုသို့နိုင်ငံတော်ဘဏ္ဍာငွေများကို ရယူသုံးစွဲနေခြင်းသည် နိုင်ငံတော်အတွက် အခက်အခဲဖြစ်စေသလို ဆင်းရဲမွဲတေမှုကို တွန်းအားပေးရာရောက်နေခဲ့ပါသည်။

၂၀၂၀-၂၀၂၁ ဘဏ္ဍာနှစ် ၂၀၁၉-၂၀၂၀ ဘဏ္ဍာနှစ်တွင် အထက်ပါ ဝန်ကြီးဌာနသုံးခုမှ နိုင်ငံတော်ဘဏ္ဍာငွေ၏ စုစုပေါင်း ၂၄ ရာခိုင်နှုန်းကို ရယူသုံးစွဲနေဆဲဖြစ်သည်။ ၂၀၂၁-၂၀၂၂ ဘဏ္ဍာနှစ်တွင် အာဏာသိမ်းစစ်တပ်မှထုတ်ပြန်သော စာရင်းတွင်လည်း ကာကွယ်ရေး ဝန်ကြီးဌာန၊ ပြည်ထဲရေးဝန်ကြီးဌာနနှင့် နယ်စပ်ရေးရာဝန်ကြီးဌာနတို့သည် နိုင်ငံတော်ဘဏ္ဍာငွေ၏ စုစုပေါင်း ၂၆ ရာခိုင်နှုန်းကို ရယူသုံးစွဲနေလျှက်ရှိသည်။မြန်မာအစိုးရ၏ဘတ်ဂျက်အသုံးစရိတ်တွင် အာဏာသိမ်းစစ်တပ်၏ အသုံးစရိတ်သည် အများဆုံးဖြစ်သည်။ ငွေလုံးငွေရင်းအသုံးစရိတ်များတွင် ပညာရေးနှင့် ကျန်းမာရေးအသုံးစရိတ် နှစ်ခုပေါင်းထက် အာဏာသိမ်းစစ်တပ်၏ ငွေလုံးငွေရင်းအသုံးစရိတ်သည် ပိုမိုများပြားနေကြောင်း တွေ့နိုင်ပါသည်။ ၂၀၁၉-၂၀၂၀ နှင့် ၂၀၂၀-၂၀၂၁ ဘဏ္ဍာနှစ်တွင် အာဏာသိမ်းစစ်တပ်သည် ပညာရေးငွေလုံး‌ငွေရင်း အသုံးစရိတ်ထက်နှစ်ဆခန့် ပိုမိုများပြားစွာသုံးစွဲခဲ့ပြီး ကျန်းမာရေး ငွေလုံးငွေရင်း အသုံးစရိတ်ထက်သုံးဆခန့် ပိုမိုသုံးစွဲခဲ့ခြင်းကို မြင်တွေ့ရပါသည်။ အာဏာသိမ်းယူပြီးနောက်ပိုင်း အာဏာသိမ်းစစ်တပ်မှ ၂၀၂၁-၂၀၂၂ ဘဏ္ဍာရေးနှစ်အတွက် ထုတ်ပြန်ခဲ့သော ငွေလုံးငွေရင်းအသုံးစရိတ်တွင် ပညာရေး အသုံးစရိတ်ထက်သုံးဆခန့် ပိုမိုများပြားနေပြီး ကျန်းမာရေးအသုံးစရိတ်ထက်ခုနှစ်ဆနီးပါး များပြားနေသည်ကို မြင်တွေ့ ရပါသည်။

အာဏာသိမ်းစစ်တပ်မှ အစိုးရ အသုံးစရိတ်၏ (၂၀) ရာခိုင်နှုန်းနီးပါးကို ရယူသုံးစွဲနေခြင်းသည် လုပ်ရိုးလုပ်စဉ်ကဲ့သို့ဖြစ်နေ

ထို့ကြောင့် တိုင်းပြည်၏ နှစ်စဉ်အသားတင်ထုတ်လုပ်မှု (၃) ရာခိုင်နှုန်းအထိ အာဏာသိမ်းစစ်တပ်မှ သုံးစွဲ နေသည်မှာထင်ရှားပါသည်။ ဦးသိန်းစိန်အစိုးရ လက်ထက် ၂၀၁၅-၂၀၁၆ ဘဏ္ဍာရေးနှစ်တွင်လည်း တိုင်းပြည်၏ အသားတင်ထုတ်လုပ်မှုမှ (၄.၃) ရာခိုင်နှုန်း ရယူသုံးစွဲခဲ့သည်ကိုကြည့်ခြင်းအားဖြင့် အာဏာသိမ်းစစ်တပ်မှ အစိုးရ အသုံးစရိတ်၏ (၂၀) ရာခိုင်နှုန်းနီးပါးကို ရယူသုံးစွဲနေခြင်းသည် လုပ်ရိုးလုပ်စဉ်ကဲ့သို့ဖြစ်နေပြီး စစ်အသုံးစရိတ်ကြီးထွား လာမှုကြောင့် အစိုးရအကြွေးမြီများပြားလာမှု၊ ပညာရေးအဆင့်အတန်း နိမ့်ကျမှု၊ ကျန်းမာရေးအဆင့်အတန်းနိမ့်ကျမှု၊ ဆင်းရဲမွဲတေမှု၊ အဂတိလိုက်စားမှုနှင့် လက်ရှိနိုင်ငံမတည်ငြိမ်မှုကို မီးမောင်းထိုးပြသရာ ရောက်နေပါသည်။ ထိုသို့နိုင်ငံရေး မတည်ငြိမ်မှုသည် နိုင်ငံဖွံ့ဖြိုးတိုးတက်ရေးနှင့် ဒီမိုကရေစီရှင်သန်နိုင်ရေးအတွက် အလားအလာမကောင်းနိုင်သည်မှာ ထင်ရှားနေကြောင်း တင်ပြအပ်ပါသည်။

Leave a Reply

Your email address will not be published.